About Us

Philadelphia Myanmar Community Church (PMCC) in 2008, January kha nipi masa pan in Rev. Than Lian Paute’ innkhuan in kipan toto in, nipi sim in, biakpiakna nei toto uh a, Philadelphia khuapi  kim ah zomite hong tung peuhpeuh in, zomi pawlpi dang om nai lo ahih man in, pawlpi in hong neih tohtoh na uh tawh akilam toto zomite pawlpi ahi hi.
Pawlpi akipat cil in Bethany Church and Ministry cih tawh kipan ahih hangin, 2008 sung mah in Myanmar Community Church ci in, kikhopna sungah lai-gelh in, kisuang hi. Pawlpi bylaw zong siapa mah in bawl a, kumpi theihpihna ngah nading ngen hi. Kumpi tungah theihpihna a nget ciangin, pawlpi minpen, “Myanmar Community Church” ci nawnlo in, “Philadelphia Myanmar Community Church” (PMCC) cih ding hoihsa in laih hi.
Hih min tawh kumpi tungah pawlpi theihpihna ngen in, 03/31/2010 a kipan in, ki-ngah a, pawlpi sumpi zong hih numbat mah zangin, bank ah kikem pan hi.
2008, January (6) nipi masa in kikhopna masa pen kinei in, Bethany Church and Ministry ci in, Rev. Than Lian Pau in Yuzanah, Yangon a, apawlpi min mah puasak in a innkuan tawh biakpiakna kipan hi. Hih hun sungin, pa Khup Khan Zam leh sia. Than Lian Paute innkuan in, kikhopna nei toto uh hi.  Hih hunsung mah in, Vungsen leh a nau Pauno leh Kayin numei LiLi cih te zong hong pai zelzel uh hi. 2008 sung August in Nu Dim Zam Niang hong tung a, December kha  pa Thawng Hen Thang te innkuan hong tung a, a mau innkuan zong hih pawlpi ah kihel pah in, citak tak in, pawlpi ah akipiak theih bang un, kipia in, pawlpi panpih uh hi. Pa Len Za Piang te innkuan hong tung leuleu in, 2011 dong hong kihel uh hi. 2009 August in, pa Suan Lam Pau te innkuan hong tung uh hi. 2009 Nov kha in pa Thang Khan Dal te innkuan hongtung leuleu in, tuni dongin, citak hanciam tak in, pawlpi panpih theih zah in panpih uh hi. Hih hun sung mah in Tg. Cin Go hanciam na tawh Somerdale, NJ kim a, a- om, zomite in zong kikhopna ah hanciam tak in tuni ciangdong in,  hong ki hel in pawlpi ah thala in, tha hong pia uh hi.
Pawlpi in kumpi tungah phiangsiah piak kulo dingin kingen a, PMCC in April 29, 2011 a kipan in, (501) c (3)  ciamtehna ngah hi.  South Philadelphia, Calvary Temple biakinn pen PMCC in zat theih ding in a kingah ciangin, 10/03/2010 ni a kipan in pa Khup Khan Zam inn (1921 Edwards Rd, Folcroft, PA 19032) kizang nawnlo in, tuni dong in, South Philly, Calvary Temple ah kikhawm hi.